MG - XXXG-01H2 - Gundam Heavyarms Custom
完成紅大魔之後又繼續砌5小強.
第一次見武裝係武裝改. 藍藍綠綠, 周身都係槍. 坦白講, 無乜特別感覺. 決定了砌5小強, 當然係惡補下5小強的背景. 比較之下, 覺得武裝改的配色比起武裝吸引多了. 紅加橙色, 真係吾係我杯茶. 所以很快便決定拎盒武裝去噴武裝改的色. 原因很簡單, 因為平.....盒武裝200有找, 武裝改差不多一個double. 對於我呢類吾係鐵粉的玩家, 真係無理由俾多咁多買武改.
剛巧上網見到有位師兄割愛放盒完成品, 真係好靚, 我馬上cap圖, 作為日後參考. 令我非常感慨係一盒如此高質的完成品竟然只係賣1800. 扣起400左右的成本, 假設師兄極速完成, 上晒色, 又貼滿水貼, 點都要20個鐘掛? 即係$70個鐘? 我真心吾會咁去賣仔.....當一盒超合金過2K都大把人追, 我真係覺得太多人吾當上色模型係件作品, 諗落其實都幾心酸. 我明白祖國相對人工低, 大把人願意以極低的價錢接代工, 所以上色模型品跟本好難賣得貴. 同其他藝術品一樣, 大概只有"出名"的大師才可賣得起價吧.
講番盒模型, 由剪件個一刻開始已經知道係一個地獄. 同Zeta 2.0一樣, 好多好多細細粒的件, 單是剪同磨已經花了好多心機同時間. 向好的一方面諗, 只要做好配色, 本身就好豐富. 不過.....其實大部份件都係為左準備打開的彈匣. 如果你吾打算打開...... 另一件非提不可就係彈匣的活動位好多都係一粒好細的件. 我個人認為開合幾次絕對係好易爛. 無論組裝定影相時都要萬二分小心. 同埋成個設計俾我的感覺係用到好盡. 即係有吾小部位計算得太盡. 括油係一個問題, 所謂可動位又吾夠實淨, 其實我真心覺得Bandai未來係一些關節位應該用金屬取代塑膠, 例如Zeta KA強調變型, 再用細細粒的塑膠件跟本令人吾放心去玩.
仲有一樣要怪自己. 一直以來, 好細粒的件我都好小仔細打磨, 因為9成吾見光. 不過今次為左彈匣的開合, 好多水口係當眼處.....拆卸再噴又驚爛, 只好默默接受, 最多貼個貼紙遮一遮. 同埋真係太多件, 開始時我又吾知件的位置, 所謂分色真係亂咁來. 最後當然有部份都係要重噴.
銀色 : SM201
金屬鐵色 : Modo MX-02
金色 : Gaia EX-08
金屬紅 : Gaia-038
深藍色 : IMPEZ 057
藍黑色 ：IMPEZ 036
白色 : C107
灰色 : UG09
剛巧砌呢盒時係復活節假期前, 係開始假期前已完成了本體, 諗住假期咁長, 可以完成多一盒掛? 點知成個假期忙忙碌碌, 連支炮都無時間噴, 莫講再砌另一盒了. 講番支炮, 其實係副廠的產品. 我跟佢原本分色, 灰轉銀, 深灰轉金屬鐵色. 佢原本應該係類似武改咁2支組合一齊. 不過我又覺得有點過大, 都係一隻手一支算了.
完成之後覺得真係吾錯. 比本身個配色好多了. 可能有好多師兄鐘意周身炮, 不過我覺得再加上去就太多了. 而家咁已經係極限. 一如之前所講, 開合位(特別係胸) 好易爛, 噴得咁辛苦, 點都想開來影幾張相, 但腰個幾個位一開就花, 真係吾敢開. 整個製作過程真係幾受罪, 覺得噴油時噴極都噴吾完, 好多好細的件, 上夾都麻煩, 之後又逐粒噴, 真係噴到個人好灰. 完成之後, 擺左一個單手開胸的動作. 有咁上下年紀的朋友應該都知呢個經典pose係邊個. 呢個pose, 由我一開始砌已經係腦中出現, 吾擺吾得. 雖然外型上係非常值得推介(港幣180一盒, 平過HG, 想點先?), 不過我就吾想再砌一次了.
五小強最後一盒神龍, 真係吾知改什麼顏色好....好鬼中國風的肚兜......救命......
Full Size Photo link :
https://photos.app.goo.gl/inTrZjrekqFchoSEA
#HeavyarmsCustom, #GUNDAM, #MGGundam, #Gunpla, #XXXG01H2, #GundamW, #EndlessWaltz
[
本帖最後由 ngszewai 於 2023-4-12 12:33 AM 編輯 ]
分享
