RG012 - RX-78 GP01 - GP-01
可能係我上次製作的RG TV Wing吾夠好, 得到的Like數很低, 心情難免有點難受. 其實未出RG Wing post 的時候已完成了呢盒RG GP01六成, 不過心情吾好, 每日只係整小小就收手, 如是者拖拖拉拉, 龜速進行去製作, 拖左幾日終於完成. RG GP01一直都存在係我想砌List 入面, 網上的評論都是一致好評, 可惜我本身吾係0083的粉絲, 再加上我對一體成型的骨真的好有介心, 所以一直未有去製作.
RG一向的特色也是分件好細緻, GP01當然不例外. 就我個人來說, 我前期製作的RG也會有大腿, 小腿前後用不同色的作法. 不過最近我更喜歡用回同一隻色另加小件作分色. 呢盒RG本身白色的所謂分色實在分別不大, 不留神是看不見的. 我重新分過晒顏色的布置, 加深灰同白的色差. 係噴油時發現本身灰色位用了太淺色, 令佢同白色太似, 所以又要噴過. (事實証明, 有愛的模型, 發現有問題係會做過.....) 骨架跟前期的RG一樣, 都係小弟極討厭的一體成型, 膝蓋附近有個黑色骨位外露同埋手臂活動關節竟然有明顯的水口位.....玩咩...副骨又難磨, 上色又易花, 水口咁多位吾放, 係要放係個當眼位!......成盒野, 我只有幾粒件吾噴, 因為個種C字型的扣, 試過上完色, 一拍入去就爛, 所以好有介心. 但原來其中2粒就係心口黑色個扣!!!! (所以呢盒吾可以稱為全上色......) 另一方面, 好多件的刻線非常淺, 自己吾加深跟本滲吾到線. 組裝上, 裝完甲上骨最好檢查活動情況, 我有一邊腳彎完就申吾直......結果又要拆再打磨小小先申直到. 條骨本身上油吾實, 好易括花, 其他組裝方面要小心點都算順利.
有別於最近砌的機體都係大背翼, GP01個背包好正! 整個感覺好平衡! 係噴呢盒模型時有個想法, 不如下次揾盒平噴(吾噴陰影), 吾知效果點呢?
白色 Mr. Colour C107
深灰色 Mr. Colour C306
紅色 UG20 (陰影用瑪沙深紅)
藍色 Mr. UG14 (陰影用深灰藍)
鐡色 Modo MX-02
銀色 Mr. Colour SM206
黃色 Mr. Colour C58
關節 UG09
背包 : Mr. Colour 36 深綠色
總的來說, 比例上要挑剔的係紅色腳板過大, 個隻可動手的手指公不合比例地長. 其他整個GP01外型比例也可說是無懈可撃. 中間的核戰機雖然可變, 不過無一件代替件. 即係除非你放棄MS形態, 如果吾係佢係吾會出現的. 而咁細架核戰機仲要變, 好多部份的連接位好似好化學咁. 我知道RG本身係追求高精密度, 不過我始終覺得係無必要整到架核戰機都要變型放人去. 整隻組裝以後, 沒有舊RG會有零件掉下來的問題, 相反仲有小小緊. 除了必要地接受舊RG個一體成型關節及可能手指之外, 我個人給予呢盒RG極高評價, 絕對值得入手去玩. (吾係入手去儲)
基本上每次我出RG的成品都有好多師兄反映不喜歡RG零件太細件, 不太喜歡等等. 零件太細當然是真, 有部份件仲好難打磨. 不過RG又真係有佢的好處. 我會當成是舊瓶新酒. 即係好多人走去番唱口水歌咁, 重新的編曲可能係超越前人, 也可能之前更好. 但有好多RG係真係值得一玩的. 襯大家對眼仲好地地, 好去玩啦.
另一個想講2句的是滲線問題. 我知有好多師兄鐘意條線要好實, 仲要粗幼均一. 仲有好多師兄極之反對用黑色滲線. 其實我滲線的質素好差, 我只會係一定要滲又極淺的刻線的情況下先加深刻線再滲. 對我來講, 滲線就好似係2件野夾縫之間藏污咁. 再加上我一向都噴漸變, 所以我抹滲線時都係求其, 有小小污漬都無所謂. 我明白對好多人來講係質素差, 難以接受, 不過我就係鐘意咁. 如果個盒吾噴漸變(RG RX-78), 我相對條線就會抹得乾淨點. 我成日覺得, 用乜方法都好, 自己鐘意就得.畢竟盒模型係自己的, 所以我係吾會做代工的. 未夠班, 何苦比人奚落自己的作品呢?
題外話, 呢2年都係不停聽到要反炒價, 我個人吾係好認同. 明買明賣, 只要吾係行騙, 我認為係自己一個選擇. 奇怪的是, Bandai不停加價, 不停搵你錢就心甘情願 (而家一盒RG都300+), 被其他人賺就喊打喊殺. 講真, 我覺得網上好多模型的價錢都好合理, 只係大家成日停留係佢最平個時的價錢. 以呢盒為例, 這個級數的模型都只係150, 大家仲想點? 有時間日日去舖頭搵平貨, 不如開開心心玩下現貨, 對我來講, 最緊要順路交收. 炒貴了個小小, 車錢都係度啦. 希望各位師兄玩得開心, 炒貴好多咪等下先玩, 大家一定都有吾小山積存貨, 對嗎?
完成一盒自己喜歡的模型真係令人好開心. 而家心情同完成Wing TV完全不同. 希望各位師兄都好好享受呢個嗜好!
Full Size Photo link :
https://photos.app.goo.gl/pnx5VkE6vGpRJQF99
#WingGundam, #GUNDAM, #RGGundam, #Gunpla, #RG, #Wing