MG - MS-06J - Zaku II (2.0)
MG Zaku 2.0 是一隻十分出名的作品, 可動性高, 外型漂亮, 基本上可說是揸古產品的一個標準. 事實上組裝過程中都充滿驚喜, 難怪揸古2.0成為長期被追捧的對象. 由於已有老虎2.0的組裝經驗, 今次的組裝更加順暢. 同老虎一樣, 骨架只處理了見光位, 入面連打磨都懶. 但今次吾係先剪晒件出來, 而係跟說明書逐個步驟做, 見光的便打磨, 依要噴的顏色分類, 可組裝就先組裝. 外甲就如以往一樣, 剪晒出來慢慢搞.
因為工作繁忙, 身心俱疲. 好多時我都當磨件係休息的時間, 俾個腦休息一會. 特別想提一提個排管的設計, 真係抵讚. 我個人認為絕對係GUNPLA歷史中其中一個偉大的設計. 係老虎已經試過一次, 係揸古身上更加好. 每粒喉只有一個水口位, 有軟膠穿起, 可以一整條去打磨, 幾分鐘就完成一條. 揸古排喉有好多彎位, 其實吾可以粒粒一樣. 佢呢個設計真係做到非常到位的型狀. 整個打磨過程好快完成, 於是又去工作室噴油.
淺綠色用番上次HG 雙面蟹的青蘋果綠, 至於深綠色則用了上次綠勇的深綠. 結果是後悔不已. 上次噴綠勇已經覺得隻綠吾夠深, 諗住今次配淺綠, 應該無問題. 不過結果都係一樣, 隻綠吾夠深.....已經噴好晒, 吾想也沒時間再改, 於是算了. 呢支Gaia-027, 睇來要打入冷宮了.
上色過程中要用夾夾實每件模型, 我好多時都儘量拍埋先噴, 避免鴛鴦色. 一盒MG的件量真係遠比HG多, 夾件都用吾小時間. 而條喉有軟膠穿起, 真係無比方便. 一如以往, 陰影, 高光再補主色, 過程順利, 沒太多失誤. 最近因為換了2款新噴筆, 一支i-wata HPCP, 一支雙星PS-289. 跟我之前用的sparmax比, 我真係吾覺i-wata有好大分別. 相反另一支PS-289, 出風可較大細, 噴出來更易掌握. 覺得非常不錯. 剛巧有網友上amazon JP買野, 順便一齊買野慳運費, 運到香港都吾駛650, 非常抵用, 所以買定一支當備用.
綠色 : Gaia 027
淺綠色 Gaia 026
灰色 : UC09 淺灰色
鐵色 : Gaia-020
黑色 : Mr. Colour UG16 極深藍灰色.
上色之後, 開始組裝. 成盒模型我都給予很高的評分, 除了以下3點. 第一, 對腳排喉真係吾得. 可能為左要就活動性, 佢用彈弓係穿起對腳條喉. 但問題係第一好易甩, 第二係我噴晒條喉的陰影位, 彈弓太鬆, 令好多粒喉不停走位, 每次放好都要遂粒轉番個位. 第二又係手掌的問題. 掌心個小卡位跟本卡不穩支槍, 不停跌不停跌. 結果要用膠水固定支槍, 佢又無做型手, 即係其他炮又用吾到. 我知可買坊間做型手, 但我未試過. 第三係槍尾又頂住手前臀, 呢個問題基本上發生係每一隻揸古身上. 結果都係槍尾剪走小小, 令佢動作自然點.
總括來說, $300吾洗的揸古2.0係一盒非常值得你去玩的模型! 模型本身的成色已經非常不錯, 如果想製作部隊, 素組消光已經有非常不錯的效果. 各方面都係水準之作. 除非要追求RG化, 如果吾係, 睇吾到有乜需要出3.0
Full Size Photo link :
https://photos.app.goo.gl/UbeCsuGnm4ULK1eo6
#MS06J, #Zaku, #MGGundam, #Gunpla, #MG
分享
