HG081 Zock MSM-10
完成了龜霸, 完成了愛爾蘭魔蟹, 終於來到雙面蟹.
呢3隻蟹係SD入面係一個Bundle set, 也直接令我覺得佢地好似係一個小隊咁. 所以當然係要一氣呵成咁製作. 事實上, 係2021年, 我一直密切留意雙面蟹的貨, 因為一直買吾到. 每次見再販, 總有人高興地在FB公告天下, 不過我就係買吾到. 等了又等, 好多師兄都同我講來緊2~3月又有再販, 吾好急. 不過算了, 吾等了. 最後我都係上網"徵"到一盒. 自己認為價錢吾過份, 吾想太多了. 放俾我的師兄都有問我係咪自己砌, 我當然即時又分享下我的成品, 証明我真係砌模型, 吾係為炒賣.
難得入手, 當然即時打開來睇. 即時的反應係收番埋. 基本上睇完成份說明書, 絕大部份位置都係左右夾埋, 關節的設計好似去番FG年代, 乜都係左右夾埋, 完成了一件之後, 第二件又裝上去. 對手, 一共係3層一件疊一件咁整, 個一刻真係呆左. 消化左2日, 以一個挑戰者的心態去接受B記俾我呢個挑戰. 製作過程中, 總好似有幻聽咁聽到B記同我講"我肯出雙面蟹, 你都好去還神啦, 仲嫌三嫌四?" 無錯, 係0079的機體入面, 只有佢係最特別, 連MG都無. 砌啦, 仲問.
於是, 開始計劃一下製作順序, 可以先做無縫的先處理. 正式開始漫長的製作過程. 剪件, 無縫, 上色, 做遮蓋, 做第二層. 如果遇到膠水溢出的無縫吾理想, 又多一日, 因為要用畢地補, 又要等一晚. 單單係綠色一隻色, 我分5次噴先完成. 我噴一隻色要噴三隻色(主色, 高光, 陰影), 即係單單綠色已經要洗15次筆.......最慘係最後2次都係噴二件又噴完, 真心係好折磨. 另外, 吾知點解用埋畢地補完無縫, 打磨好晒再噴都係有一條小小深色左的痕, 噴個時吾係好覺眼, 乾左之後細心睇就見. 我估一係打磨時畢地吾夠時間乾透同有收縮現象, 一係我無噴底灰, 遮吾到......
無縫處理之外, 雙面蟹本身的可動性都係非常之低. 以佢的外型, 好難理解點解咁受歡迎. 莫非真係"醜到盡頭就是美"?
整盒模型最可取之處係夾口好好, 位置高低都好準, 算係無間無縫中間小小的亮點. 不過要留意監視器位置係有一塊膠片, 塊膠片本身黑底, 半透光, 上面有白色的刻度, 裝上去之後真係生色不小. 但裝完之後本身透明黃隻"眼"就接近睇吾到. 小弟最後用張光面的紫紅色貼紙貼上去先見到隻眼.
上色方面, 上網搵料時見到有位師兄的作品隻綠色非常好看, 是比原色深小小. 於是即刻上網買油. 好多作品都用左好鮮的紅色作為噴咀色, 我就想成隻深沈點, 低調點, 所以用粉紅色做噴咀. 而爪則用橙黃色. 由於每晚都要等無縫的膠水乾, 每晚都係做得小小, 多出來的時間我就係細位慢慢手油補色. 本來粉紅色噴咀中間的凹位我用左黑色, 砌起吾靚我又抹走佢, 不過好難抹晒, 所以最後就好似而家咁. 而上面個四粒同下面個四粒因應位置, 我係用吾同的光暗位處理, 不過我偏愛白色係尖頭位, 所以全部都噴白個尖頭. 另一方面, 隻綠色真係好好睇, 噴完雙面蟹之後都想搵隻揸古試下噴.
綠色 : Gaia 026 淺綠色
灰色 : UC09 淺紫色
紅色 : UC10 淺紅色
黃色 : Mr. Colour C58, 紅色陰影
因為全套0079都吾多水貼, 呢盒都吾多貼, 素一點.
坦白說, 砌雙面蟹的過程的確訓練左小弟的耐性, 打磨, 無縫以及解難的能力. 開玩笑的說, 砌完雙面蟹, 你最小解鎖一個技能. 一係無視技能, 一係補縫技能. 我明白, 對一眾砌開老模的模友來說, 呢d係小兒科, 不過對我呢類被Bandai寵壞的人來說, 今次都係一個大挑戰. 完成左雙面蟹之後, 打開HG吉姆準備開工, 又係成盒都左右夾埋, 我竟然吾覺得好有壓力. 吾通我真係成長左?
Full Size Photo link :
https://photos.app.goo.gl/E18jSuut1vkRN8r46
#MSM10, #Zock, #HGGundam, #Gunpla,#HG
分享
