MG - 百式2.0 - MSN100
之前有睇過我HG 百式2.0都知我對百式有一份情意結. 係我停工個十年, 我只係買過幾盒模型, 其中一盒就係MG 百式2.0. 當時的想法係佢本身電鍍, 水口吾明顯, 如果想素組呢盒好合適. 不過一直無開工. 但即使我當年賣晒未砌的模型, 我都吾捨得賣. 但又一直無開工, 就咁一放就咁多年. 係2020年, 我重新開始砌模型, 有幾次好想開來砌, 特別係噴完KOG之後, 但掉轉頭又因為佢係電鍍吾想砌. 百壞都係一樣, 如果佢吾係電鍍, 可能我都入左了. 終於係我不停清倉時決定清埋佢. 就係我交收時, 買個位師兄同我講其實有隻百改係無電鍍的. 當晚上網睇下, 終於發現佢. 係確定佢無電鍍同可以砌番一隻完整百式之後, 決定入手. 講番轉頭, 400賣走盒電鍍, 450買盒無電鍍, 吾通要當個50元係洗電鍍錢?
上一次砌MG係幾時呢? 真係吾知, 最小是2007年以前的事. 只計算上色完成品的話, 只有一盒罐噴的MG Zeta 2.0, 之後應該無搞過. 10年前砌PG為主, 10年後重拾模型以HG/RG及SD為主, 一直對MG都吾大興趣. MG的身高大約18cm. 對我來說, 沒有大比例的氣勢也沒有RG的精緻, 所以一直興趣不大. 既然入手了百式, 就開工吧.
開始剪件, 黃色部份9成都係Undergate. 用係剪件的時間係多左, 不過相對易打磨. 反而係深藍同紅色的件, 水口好大粒. 咁大粒水口係剪的時候真係要留多小小, 慢慢來, 吾係好易會剪凹. 夾口方面有小小驚訝, 支炮竟然都係無夾口要補, 設計真係無得彈.
選色方面, 其實內心好掙扎, 因為上次KOG用剩好多金色, 係好金的金色, 我好鐘意隻金色. 放係KOG真係好靚, 但總感覺百式吾適合. 可能我睇開百式係香檳金, 又或者百式心口係深藍, 鮮黃金色吾夾. 最後都係噴番香檳金. 由於要上金屬油, 同平時砌消光好吾同. 砌消光時, 有打磨痕其實無乜所謂, 噴完吾多覺. 但噴光面同金屬油就會好覺, 所以打磨完都要用3000磨多次, 磨到滑滑先上色. 另外吾知係吾係個模已用好多次, 有部份件表面有縮膠形成的凹位. 最死係可能我磨完件後未抹乾淨, 有小部份件有d位噴完吾滑, 可能係磨完d粉.........砌消光的話, 呢d吾覺眼, 不過砌光面就會好覺. 其實最大原因都係我懶, 吾噴灰, 所以一花, 有微粒都好覺眼. 如果要求高最好都係噴灰, 執好先上色. 但我呢類懶鬼吾係追求完美, 都係乜都吾做, 直接上色.
主體 : Gaia EX-08 - 香檳金. 部份細件用赤金, Mr. Colour MC202. 之前砌KOG時, 我做過一次吾同金色油的測試, 所有Mr. Colour同GAIA的金色都買來試. 今次我用最淺的一隻香檳金. 其實上次試完都有幾隻金色特別喜歡, 結果個幾隻色成日用完又要買油, 不過其他就無郁過, 所以今次堅決用之前買落的油, 清一清貨. 另外, 網上各位大神都不停講要亮黑底, 之後先上金色. 其實我做測試時有用黑底同白底去試. 由於金色油係有一層銀粉底係入面, 佢地遮蓋力極高, 基本上底色影響極輕微. 不過而家市面好多吾同廠的金色, 我就買過一支人人讚好, 不用thinner開的. 不過一噴發現極稀, 要好細槍慢慢噴. 噴完一層先一層. 基本上起碼用多3倍時間. 個支油係黑底同白底分別極大. 所以小弟都係勸一勸各位網友, 自己做測試再決定點做. 對我來講, 噴多層黑底係搵野俾自己做. (我連噴灰都懶, 仲要我噴黑底咩)
胸口藍色 : 先噴深灰藍色 (亂溝, 接近黑色), 補鮮藍色mr. Colour 110係高光位, 再補主色. 就咁睇係好靚, 不過砌埋又差d. 始終我都係鐘意深色d. 所以最後都係用番原本隻深灰藍色算.
腳版紅色 : UC22 - 馬沙深紅色. 未上主色前, 原件用之前噴完心口隻深灰藍色直接當陰影色噴, 之後先一次過用主色噴.
喉管 : 先噴icy Silver, 用深灰藍色做陰影(喉底部), 再噴Finisher 透明紅
腰 : Gaia-020 - Gun Metal色. 本來用金屬灰色(關節色)為主, Gaia-020打陰影. 又係砌起覺得吾靚, 拆過出來噴020算
關節 : Mr. Colour 61 - 金屬灰色. 第一次用呢支做關節色. 本來想用普通灰色, 不過又驚同金色吾夾, 所以想試下金屬灰色. 呢隻色好特別, 金屬色不過吾係光面, 有點好RAW的味道. 另外由於絕大部份關節係吾見光, 我都儘量偷懶, 見光就搞, 吾見光吾搞.係小部份位如手肘等再配合GAIA020噴小件, 做出吾同色塊效果.
上色之後就做番滲線, 水貼等效果. 我小砌MG, 吾知一般MG係吾係呢個質數, 但呢盒百式我就覺得好高質. 好多地方吾單止係刻線, 直情係偷空等入面隻色露出來. 外型上, 我認為對腳可以短小小. 其他都真係非常好. 極之推介呢盒百式.
雖然過左咁多年, 仍然覺得百式的外型真係好靚. 係我心中, 佢永遠係我的經典.
Full Size Photo link :
https://photos.app.goo.gl/1h5rgdHam182hxnK6
#百式,#MSN100, #MGGundam, #Gunpla,#MG
分享
