BB387 - SD Nu GUNDAM - Double Fin - RX-93
今次盒SD Nu, 可能係我用最長時間完成的一盒SD.
最近呢個月都好hea, 好多晚都俾吾同原因自己吾開工, 無乜心機砌模型, 所以又清理下自己存貨, 將吾打算砌的放上網賣. 自己好多時都會同買家/賣家吹下水, share下自己的作品.
試過2~3次有幾位網友問我做吾做代工, 又問我成品賣吾賣. 聽到其實真係好開心, 感覺有人欣賞自己的作品. 又有一位買家好有誠意問我呢度點整, 個度點整, 我都儘能力詳細解答. 傾下傾下佢問我最近砌乜, 我答佢呢排無乜心機, 但有諗過下搞隻SD Nu做Double Fin. 佢的一句, "正啊, 好期待, 等睇你佳作", 聽完真係好窩心, 令我突然又有動力, 於是個晚的起心肝開工.
吾計N年前的素組, 今次係呢年幾以來第三次砌呢盒模型. 上倆次都係成年前完成, 第一次係平噴, 好多地方連色都吾補. 真係吾係好得. 第二盒完成度已經好高, 該補的色都補了. 主色的淺綠色好特別, 整體上自己都算收貨. 記得上次砌完, 我的感想係, 吾好再搞我......好靚, 不過真係好煩. 之後我開始為SD噴陰影, 技術略有改進, 當完成RG Nu後, 一直想砌多次, 不過好大個心理關口, 因為補色補到傻, 仲要係我"最愛"的橙黃色, 諗起都停晒手.
難得個晚熱血, 即時開盒剪件, 磨件. 坦白講, 有目標之後係好開心, 因為都第三次砌, 都算有小小經驗. 盒SD Nu的分件吾係吾好, 不過同RG等比仲有好遠好遠的距離. 再加上要補的係我"最愛"的橙黃色, 結果發現自己仍然係一隻井底之蛙, 技術不足. 整件成品瑕疵處處.
開工之後, 當然係拆番之前第一盒平噴個盒的背翼, 準備清舊油. 我都知應用洗油專用溶劑同超聲波, 不過支洗油水又$110, 仲貴過盒新的模型, 咁我不如買個盒吾好? 於是只係屋企用開油水加廚房用紙巾, 棉花棒等去抹. 結果係屋企花左一個多小時, 终於抹晒6條浮游炮. 跟手補埋小腳的夾口, 槍的夾口等. 唯一的小改造就係整短個下巴. 同Hi-Nu吾同, 我個人幾喜歡而家原設對腳的長度, 吾需要改長了. 一切準備就緒, 就開始準備上色.
由於有大量遮蓋及上油的先後次序問題, 今次我係先完成白色, 做遮蓋, 之後做黃色同紅色, 做遮蓋, 最後係深灰藍色.
主色的白色, 我仍舊是用Mr. Colour 107, 陰影用淺灰UG09. 一如概往, 係我掌握最好的顏色. 無太大問題.
我用左深Navy Blue取代黑色. 之後補高光用淺灰UG09. 但開油開得太稀, 有小小災難發生.
黃色支角係先噴白底, 跟住黃, 再噴橙黃係陰影位. 細部直用橙黃色
紅色用高達專用UG20
由於做double fin, 一共要係要做 6x2=12支浮游炮, 浮游炮上下再一對, 即係24支! 基於分件問題, 24條全部都要做遮蓋. 本來一早打算做完橙色, 手油黑位. 不過又忍吾住走去做遮蓋. 結果就大錯特錯. 有部份膠紙痴得吾好, 再加上黑油開得好稀, 令到之前噴好的橙都被污染, 我不停補橙色油都未遮蓋到. 真係灰爆. 剩係噴完補執都用左一晚! 再加上砌起發現原來好多位都見光, 要補黑色, 搞呢24支野真係人都癲.
另一難搞的位係小腳, 腰, 膊頭小小的橙色, 因為真係好難做遮蓋, 全部手油, 之後又要油中間的黑色位. 真係油到人都癲.
完成補色之後就係水貼. 之前的RG仲有好多Nu的水貼剩, 用番係SD就fit晒.
做晒所有功夫就砌起, 發現可能我成日裝拆個24支浮游炮, 而家鬆晒, 跟本裝吾穩. 於是又要落膠水, 小不免又整花d油. 背包同浮游炮連接個位又係鬆晒, 又要落膠水, 又整花油.....
總括來說, 呢盒SD各方面都吾錯, 但要整靚佢功夫吾會俾SDEX小. 拖拖拉拉的進行, 差吾多成個月先完工. 總感覺最近小了團火, 好似未有令我十分期待的模型出現.
PS : 有次有位網友係FB討論, 點解影個盒都百幾個Like, 自己砌得咁辛苦先咁小Like. 其實我的成品好多都係得20~30個Like. 我都有小小習慣了. 經歷過有次得3個Like, 我對呢d野都無晒感覺. 砌完, 有人欣賞當然開心, 無人俾Like吾等於自己砌得吾好. 自己砌得開開心心最緊要, 大家加油!
#RX93, #NuGundam, #SDGundam, #Gunpla
附件: 您所在的用戶組無法下載或查看附件
|