|
回覆隊長的提問,其實我買咗AK Worn Effects 和 Heavy Chips之後,都係試咗一次,發覺Heavy chips 比較杰少少,油甩出來比較大塊少少,Worn effects 就甩得細點D幼細D.至於用法,呢兩隻AK通常都會用筆噴,亦可以手塗,但手塗一般都會比筆噴來得較厚及不均勻,亦暗示甩出來的油會大塊D.至於HS就可以用原罐噴或者係用樽裝住噴出來用的膠液再倒入噴筆噴.但如AK液一樣,通常噴出來的膠都會好杰好難噴又或者噴出來的液會在漆面起水珠.....呢D水珠狀有個問題就係D膠液會唔均勻,有珠的地方(即是厚D啦)甩出來的油就會大塊D圓D,解決辦法係拆解膠液嘅表面張力,我自己會用一塊用淨的肥皂點少少水(但不須太多水)再點落去膠液果度,咁樣D膠液噴出來都比較貼面D均勻D.
至於D膠液要噴幾厚先至好呢?就要視乎要想做什麼效果:-
細緻效果
膠液要薄,貼面,薄薄的噴兩層就足夠,但要留心,因為層膠噴完乾咗之後便看不到(但存在),如果在上面再噴多一層就照計(即是總共兩層),越噴多層就越厚,甩出來就越大塊喇,但外表係完全睇唔到分別,所以最好記住邊一個面已噴咗,以免越噴越厚.
大塊效果
呢個就易做好多,用同樣的膠液在同一個位置噴厚D就得,不過甩出來的油會好大塊,做唔到細點.
面油方面
如隊長所講,要油甩得細緻,油就唔可以咁厚.一般噴油會調到隻油好薄,慢慢一層一層咁噴,噴到見到真色為止,但我發覺呢種噴法用在HS面唔係好得, 這可能係噴得越多層,D油就越厚越難甩到,同時,油嘅thinner越多就越影響下面嘅HS.我會將面油調到稀杰度適中(但千其唔好太薄,太多thinner),目的係最多噴兩層油面就見到真色.
仲有一樣值得注意係濕水的時間,我會係噴咗面油一小時之後至去濕面做甩油動作.如果時間太短,油面跟本未乾,面油一濕水就會化開溶解,但如果太耐才濕水做甩油,層面油已經開始乾固,水份就好難透過面油去溶解HS做甩油了!
隊長問邊隻AK好用D?我會用Worn Effects,因為只要噴厚D就可以甩大塊D,做到Heavy chips效果!
以上只係我自己的主觀及井底之見,位位師兄嘅上色習慣各有不同,大家最好自己用件廢件試試先!
|
分享
