原帖由
twinsa 於 2010-3-9 12:16 AM 發表
香港呢個城市真畸形, 港男憎港女, 港女又鬧港男, 皆因大陸有大把貨, 樣靚身材正任班港男選擇...
有一班為數唔小既港男淨係識即食文化, 從來唔用心機諗下點溝下d 港女, 因為北上你揚起d 銀紙大把女人 ...
你真係冇得頂, 可以令我睇到忍無可忍, 登記做會員就係為左黎回應你.
睇完你係呢條題目既回應, 我只覺得充滿偏見同雙重標準, 以下我集中一次過來批評(""入面係引用你講既說話):
"有一班為數唔小既港男淨係識即食文化, 從來唔用心機諗下點溝下d 港女, 因為北上你揚起d 銀紙大把女人會自動埋黎溝返佢轉頭~"
"最後, 有冇諗過點解個個世世代代d 古惑仔佢地身邊女性不絕~? 甚至肯為佢地出黎做小姐~? 唔係佢地有錢有面, 而係佢地有 Heart 有膽, 唔會為自己出身自悲, 夠膽對住女仔表白, 夠膽作出承諾~"
"建議你翻睇周星馳套 "喜劇之王", 裡面 二打六 "周星馳" 同舞小姐 "張柏芝" 承諾果兩段黎得係幾突兀, 但又好自然感動... "
1. 我唔知你係真唔知定假唔知, 真係睇唔出定選擇性失明, 話港男即食文化, 其實你眼中港女重視男人口頭承諾咪一樣係即食文化! 層次不見得比港男高.
有把握做得到既, 講出黎先叫承諾, 如果唔肯定做得到, 甚至明知做唔到都講, 果 D應該叫9吹.
一個男人係唔係值得女仔同佢認真發展, 係要睇佢既人品, 抱負, 處事方式, 能力, 對家人同身邊朋友既態度, 而唔係有冇口頭承諾, 港女就只會著眼於眼前既甜言蜜語.
既然你連古惑仔溝女都可以用黎做例子, 咁我又問下你, 古惑仔靠古惑, 靠9吹溝到既女, 到最後可以同佢地開花結果既有幾多成? 仲講到為佢地出黎做小姐咁偉大, 咁請問最後有冇修成正果呀? 冇, 咁呢D所謂承諾咪又係即食文化!
啊, 港女對即食文化既追求, 你就認為港男應份去滿足, 相反, 港男對即食文化既追求, 只不過係北上搵一D願意offer既女人去滿足佢地(雖然我唔同意你講到上面D女人個個都係吼住港男個荷包, 不過我姑且base on你個assumption), 你情我願, 都冇話要港女改變自己去遷就佢地, 反而要俾你抨擊? 哈, 你做人都幾唔公道.
2. 如果一個男人, 唔將自己既選擇範圍局限於港女, 咁佢根本就冇必要花心機去取悅D港女, 唔好講到呢D野係港男份內事, 又或者港男有公民義務去滿足港女需要咁, 黑奴時代已經過去, 港女並唔係亦冇資格做港男既奴隸主. 自由社會本來就係你揀人人揀你, 加上資訊愈開放, 人口流動性愈高, 大家既選擇只會更多, 點解過去皇帝女唔憂嫁, 到今日會變成咁既局面? 與其話港男唔肯為自己花心機, 不如先問問自己有乜野值得男人為你花心機. 就算北方女人真係你講得咁cheap, 見錢就自動獻身, 只要港女可以證明到俾人睇, 佢地既價值係高過花心機既成本, 都一定會有人欣賞. 肯為女人花心機既港男, 社會上永遠都存在, 但點解佢地花心機既對象永遠都冇自己份? 點解又唔檢討下?
市場係好公平, 另一方面亦好殘酷.
3. 究竟你明唔明白咩叫拍拖, 或者拍拖既本質係乜野? 拍拖係兩個互相對對方有好感既個體, 用黎促進互相了解, 從而確認對方是否適合作為終身伴侶既過程, 兩個人只要係available, 又對對方有好感, 基本上就可以開始. 拍拖從來唔保證D乜, 亦都保證唔到D乜, 合則來係你好彩, 不合則去亦好正常. 承諾係當確認對方為合適人選既時候去做, 唔係拍拖之前做, 就算做都係假既. 否則, 根本就唔需要拍拖, 直接skip去註冊就得.
"當港男鬧港女公主病, 勢利, 為錢而活時, 又有冇諗過其實自己都係一個永遠大唔透既細路 (幾廿歲仲對住d 玩具), 用錢黎衡量一切 (包括愛情), 唔肯亦唔敢正正經經學下追女仔, 結果北上即食娶個老婆返黎解決生理 / 心理需要... 說穿港男亦不比港女好~"
"我試過因工作關係長註大陸幾個月, 同過好多廠妹吹水......最後, 係我提及我玩模型, 佢地係一臉唔信 + 小小恥笑眼光, 話玩具只係細路玩"
1. 咁講法, 你是否都係一個永遠大唔透既細路, 幾廿歲仲對住d玩具? 抑或你想話, 只有你話係玩具既先係玩具, 人地覺得係玩具既就係出於誤解呢?
2. 如港男係用錢來衡量愛情, 咁港女用花言巧語來衡量愛情, 本質上分唔分到高低呢請問?
"但細心諗下, 有幾多返大陸娶老婆既人講得一口流利普通話~? 幾多真係 "溝" 個大陸老婆返黎~? 大家知唔知大陸同香港文化差異又有幾大~?"
"問題在於點解咁奇特大陸女仔會選個港男, 而唔選個同住大陸同聲同氣既同鄉~? 在心中 la~"
"正如上面某師兄話齋, 港男港女活在同一天空, 文化背景差唔多, 與其買隻完成品硬食大大條水囗有瑕疵 (分分鐘要洗油從新攪過), 倒不如正正經經砌好現在係大家眼前果盒模型仲實際~"
"我開始明白點解咁多港女鐘意老外, 男女平等係佢地行先, 但佢地亦知道一個男人應有既風度~"
"風度唔係用錢衡量 ga, 你睇下d 老外同女仕出街, 事事照顧幫佢除褸推門拉椅, 搭車搭 Lift 會讓女仕先上... 女仔係睇呢d 細心野, 得到男士照顧呵護, 絕對比金錢來得重要 lor~"
1. 港男棄港女溝大陸女, 係港男既錯(港男淨係識即食文化), 港女棄港男湊鬼(不過開花結果的成功率比港男溝大陸女低一百倍, 鬼佬娶賓妹都多過娶港女, 港女都係自量少少好D), 又係港男既錯(港男無風度), 你再一次暴露左你既雙重標準了. 點解你又唔問下, 有幾多黎香港溝港女既鬼佬講得一口流利廣東話呀? 反過來講, 大陸女人對住個港男講廣東話, D口音點都易聽過普遍港女對住鬼佬D港式英文啦.
2. 大陸同香港既文化差異, 難道又大得過英美同香港? 叫D港女試下同D鬼佬解釋下咩叫清明, 咩叫重陽, 咩叫雙春兼閏月?
3. 咁點解你口中既老外, 又會咁奇特去選個港女, 而唔選個同聲同氣既鬼妹, 又唔正正經經砌好眼前果盒模型呀? 在心中la~
4. 仲有, 學人講男女平等講風度前, 唔該先求證一下真正既男女平等係乜野. 以下係我儲起既兩段舊文:
駐瑞典特派記者雷達:如果你聽到這樣一個忠告：「這裡不流行女士優先，所以沒必要去幫女士提行李、為女士開門，更不要在擁擠的公交車上給女士讓座，否則你會被認為不夠尊重女性。」那麼，你就到達了北歐，這個世界上男女平等程度最高的地區。
四川在線:英國人無論對「紳士風度」，還是「淑女風格」都是非常看重的。在英國朋友家做客，女主人若不能奉陪，必然會從樓上走下來，仔細解釋不能一塊待客的原因，以征得客人的諒解，並熱情地準備好客人喜歡的飲料之後，才款款離去。用餐時，最能體現英國淑女的品位和風格，她們總是輕拿慢放，舉止很和緩，講話時總是伴隨著「謝謝」等禮貌用語。
唔該你, 紳士同淑女係相對的, 自己不是淑女, 有咩資格要求人地做紳士.
"最後, 有冇諗過點解個個世世代代d 古惑仔佢地身邊女性不絕~? 甚至肯為佢地出黎做小姐~? 唔係佢地有錢有面, 而係佢地有 Heart 有膽, 唔會為自己出身自悲, 夠膽對住女仔表白, 夠膽作出承諾~"
"說穿就是國內女人其實比港女更勢利, 為生活連終生幸福都可以賣埋俾d 港男... 慶幸係, 香港生活指數比大陸仲高好多, 港男北上唔憂娶~
對住港女一佰幾拾萬唔算得d 乜 (一間 Apartment 都買唔倒), 但對比國內農村佢就係神級..."
綜合你呢幾句, 我有條必勝方程式可以贈俾港女, 袋左落袋一定終身受用, 勝讀十年書:
祖國有種獸性新人類(或者叫人形雄性獸都得), 俗稱狼狗(既然你有咁多國內同事, 不妨向佢地查詢下, 順便介紹埋俾你D港女friends), 正正就係膽夠大兼唔怕面懵, 一世人冇野叻最叻就係氹女人開心, 同時又真係有D女人甘願走去做小姐黎養佢地. 佢地之所以咁把炮, 正係因為佢地既所謂風度, 照顧, 呵護, 比起大部份鬼佬只有過之而無不及. 而另一方面, 對比港女收入同內地生活指數, 港女要養佢地都唔洗做小姐, 求其一個shipping clerk都應該養得起.
如果港女真係好似你講敢, 只要求男人肯花心機, 夠膽表白夠膽承諾就得, 咁狼狗同港女一定係天造地設既絕配啦! 港女肯俾錢就得架喇, 肯俾錢要咩風度人地都俾到架!
社會是現實的, 但機會是平等的, 港男北上唔憂娶, 港女北上一樣可以唔憂嫁. 但大前提係, 港女要願意付出港男同樣既代價.
相反, 若做人, 待人接物, 一味只想不勞而穫, 又或者下下都要自己著數左先去諗付出, 咁莫講話香港定大陸, 呢種人去到邊都好難有運行(除非連個天都要幫佢地, 就好似以前男多女少, 香港人又唔係咁多出埠或者北上既年代). 邊D人屬於呢種? 都係果句: 在心中la~
一班對住個 MON 鬧港女既港男, 你地又有冇承擔過~?
咁就要視乎有咩交換條件la, 你揀人人揀你...
另, 娶大陸老婆我覺得只係貪一時之快, 第日換黎問題只會比娶港女更多, 中港兩邊走, 安排佢住係深圳方便見面, 安排落黎生仔, 申請佢落黎,
香港住屋, 多咗幾個人係香港之後點生活, 老婆只搵倒d 幾千蚊勞力工作, 佢父母親戚係大陸有病醫d 藥費等等...
以上係娶咗大陸老婆起碼要諗既事, 反而娶港女之前拍拖可能麻鬼煩, 但娶咗佢之後一定唔需要再諗咁多, 需知人越老搵錢 & 承擔力只會越低...
先苦後甜, 定先甜後苦, 自己諗 la~
1. 你放心, 真係有認真係為自己成家立室, 為自己終身幸福打算既港男, 事前一定會諗過晒. 文件手續上既野, 對比起下半世人流流長更加係濕濕碎, 根本就稱不上係苦.
就當真係好麻煩好多手尾跟, 但呢個都唔係問題既重點, 重點應該係: 點解咁多手尾跟, 港男都選擇北上, 而唔去花下心機溝港女, 去講一D空泛既口頭承諾? 點計都係前者花更多工夫啦. 呢個問題, 係咪更值得深思呢?
2. 所謂"先苦後甜定先甜後苦"呢個選擇根本就唔存在, 係一個模糊焦點既假議題, 因為兩個人走埋一齊, 將來係點, 從來無人可以包生仔(除非港女可以拍心口或寫包單, 港男吃了苦頭後, 可以得到甚麼甜頭. 既然不能寫包單, 港男就只能從港女的言行舉止, 待人態度等等去評估). 事實上, 事情既本質應該係:
溝大陸女 - 先甜, 但不知以後甜或苦
溝港女 - 先苦, 但不知以後甜或苦
但我亦認識好多娶咗大陸女子後既無奈, 最慘係佢地相識唔夠多時已去到另一階段 (結婚), 到佢地發覺生活 / 溝通上出現問題, 出現大量煩惱事時已經返唔倒轉頭...
娶左先發覺溝通有問題, 呢種男人道行太低, 冇運行係天有眼, 不見得會因為對象係港女而逆轉.
其實男女相處在於互相尊重 / 包容, 但有人一開口就 "公主病, 有違中國傳統" 云云, 偏偏冇諗下自己其實都只係一個長唔大既 Kitdult, 亦冇咗中國男人擔起成頭家既能力...
其實現今香港男人當中, 不論係主張男女平等定中國傳統, 都各有捧場客, 不過有權無責四不像既輸打贏要主義就例外. 所以, 不論男女平等定中國傳統都好, 大前提係有權利必有義務.
我只可以講, 我而家係對住一班事事計較, 完全冇風度既婆媽男人, 我係男人都頂你地唔順, 何況女人...
唔緊要, 而家港男冇流失市場, 冇話要睇邊個面色, 女人頂佢地唔順咪唔好頂, I don't think they will give a shit.
d 港男不知就裏淨係見倒佢極端溫柔體貼一面, 卻不知佢地爛既一面一樣去得好盡, 娶咗之後先知自己接受唔倒, 到時就太遲~
有D係有D唔係啦, 不過講到呢度就真係要讚"有一班為數唔小"既港女夠坦白兼開門見山, 未開波就俾港男睇到爛既一面, 為大家節省好多時間.
追女既話當然係男人俾, 令個女仔覺得你唔係咁斤斤計較, 但呢個階段只係頭幾次, 之後拍咗拖個女仔自然會公平地付出翻, 例如佢俾睇戲你俾食飯...
咁請問如果係女追男又是否當然係女人俾, 去令個男仔覺得佢唔係咁斤斤計較?
至於你身邊d 女仕點解會認為男仕一定要俾錢... 正如我夜晚聽一八七二遊花園, 主持成日提及乜野性格既人, 自自然然就會遇到乜野食住佢既朋友, 物以類聚, 就似一個男玩家, 去到邊都會遇到d 女同佢交手咁...
唔想再遇到某一類人, 只可從自己性格著手, 先要 Change Your Mind...
上述是否適用於識來識去都係D唔肯花心機, 唔肯承諾既港男既港女?
[
本帖最後由 senna 於 2010-3-31 12:27 PM 編輯 ]
分享
