HG Origin 026 - RX-78-1 - Gundam
最近好似出左隻SD版的RX-78-1, 經過見到覺得都吾錯, 於是想自己噴番隻. 咁當然係搵我近期至愛系列, Origin來搞搞佢啦.
上次隻原色Origin RX-78, 我自己覺得其實好靚, 不過無論FB, 討論區都吾多人討論, 吾緊要, 我成日鼓勵自己, 自己覺得靚就夠啦. 今次整RX-78-1, 上完色後組裝起, 第一個感覺係以後都吾好搞改色......總感覺吾係好靚. 跟住滲番線, 加番銀色線, 個感覺總算出來了.
對比普通HG, Origin版算多件, 不過其實吾係真係太多. 都係一陣就完成. 成個製作最煩係中間紅色個2片, 我最後係自己剪膠片放入去而吾搞遮蓋. 因為吾想黑白對比過大, 黑用了上次百式亂溝剩下的深深灰藍色, 白色也放棄一貫的107, 用了深一個層次的淺灰白色. 選色的時候, 我係對住自己整個塊色板去選, 其實真係好方便, 不枉我t花咁多時間整. 紅色用了馬沙的深紅色. 之前想用鮮紅, 不過都係深沉小小好睇點. 黃色用番黃而吾係橙黃. 另外噴咀等一貫用銀色. 本來都想係黑色位噴高光, 不過真係忙得滯, 無時間搞, 所以黑位都係平噴. 可能係噴陰影時重/輕手左, 白色部份有小小件有吾同色, 都係懶, 吾搞了. 反而係用多左時間去決定關節位的件用咩色. 因為想做番小小吾同色的效果, 出來的效果都係滿意的. 腳眼, 小腳等圓形位, 係先噴白色, 之後用原裝貼紙做遮蓋再上黑色. 用原裝貼紙做遮蓋係我呢個懶人常用技巧之一, 其實好好用, 不過一定要快. 我通常吾會過夜, 噴之前先貼, 乾左即晚撕走, 因為如耐越難撕. 本來呢盒無諗住整支炮, 因為要搞好多無縫, 不過完成後又覺得用炮靚d, 於是用上次個盒支炮, 所以支炮相對係白小小.
黑 : 亂溝的深深灰藍色
白 : Mr. Color 338淺灰, 陰影用UG09
紅 : UG22 - 馬沙深紅, 高光用UG20 (正常都睇吾出)
黃 : UG21 - 黃, 陰影用UG20
銀 : SM206
關節 : UG09 - 淺灰 / Gaia020 Gun Metal
呢類型非正傳機, 改色版, 我一般都係覺得適合多水貼. 不過發現市面吾多白色的EFSF水貼, 可能高達本身係白色, 所以小出. 跟住諗住搵鐳射大炮用的水貼, 竟然又係無. 另一個問題係我吾肯定RX-78-1屬吾屬於木馬號, 因為好似未出場就無左, 所以吾敢用WB標誌. 結果係用普通水貼算了.
總結來說, 吾知係吾係睇慣左定係自己手功吾好, 總感覺原色比較靚. 最近面對的問題都係眼高手低的問題, 因為每次開檔去噴油都好花時間, 好多野都係得過且過. 小弟能力有限, 無能力設置自己專用的砌模型空間, 走鬼檔真係令我很累. 好想搵日可以一個人坐係度, 聽住歌, 一路砌模型. 不過呢個想法真係極難實現. 點都好, 就算環境有點局限, 都希望每日整小小, 努力去完成自己的成品.
Full Size Photo link :
https://photos.app.goo.gl/ViRZsvdQdjbBbdnF6
#RX78,#Gundam, #HGGundam, #Gunpla,#HG