閒談
最近慢慢地完成了一盒RG Force Impluse. 自己雖然好滿意, 不過討論的人不多. 可能因為我都係影全身, 好多細微位大家可能留意吾到, 同埋盒野本身已經好高質, 你砌一盒好小小的出來真係吾會吸睛.
呢排心情好番好多. 都有心機砌下, 不過無好似之前咁Chur, 點都好, 砌模型都係自己開心最緊要.
因為小朋友已經準備昇小. 家中書房準備開始小裝修. 我個display櫃都要拆. 暫時我都仲係霸住個櫃, 不過昇高左又薄左, 我相信過多幾年都係小朋友用埋.....勞碌半生, 有時覺得家中連自己的空間都無, 呢個就係咁畸形的香港.
砌野雖然慢, 買野真係好快. 我又入手一大堆模型. 今次仲入埋MG. 一開始諗MG就死火, 因為真係好多款, 又阻地方. 之前火左一輪的SD可能都係時候停一停. 仲有2隻搞到一半無心機, 一隻係悟空, 一隻係Sazabi. 2隻都係噴完未如理想, 無心機搞落去. 呢排想搞下1/144先. 下一隻想砌的是綠揸. 除左SD之外, 好似無乜砌過綠揸. 綠揸的覆蓋真係勁, PG, MG, RG, HG, FG, 真係乜款都有. 不過市場上好似缺缺地. 吾係無, 係小炒價. 跟手仲有RG Destiny, RG GP01, RG Zeong, RG Freedom, RG 紅揸, RG Wing EW, RG 紅蟹. 因為手痕, 仲入左HGUC 鐳射大炮, 老虎, 強人, 大魔. 想好好地完成一個1/144 的0079系列
有時上網買模型, 真係俾d賣家激死. 好多賣家堅係一個離地價賣野, 好多仲貴過街舖, 缺缺地個d就賣到天價. 事實係, 好多貨, 淘寶都仲有, 你炒來把鬼咩. 我上淘買盒RG Zeong, 250人仔, 連運費, 手續費, 匯率大約 x 1.3. 即係325左右, 香港一般放380-400, 我仲要出去交收, 不如等SF送來好過. 不過咁都吾夠一眾玩家賣野搞笑. 好多素組好的RG放售仲貴過全新..........算啦, 成交到先算.
|
分享
