http://www.hkml.net/Discuz/viewt ... %D2%AB%AC%B3%D3%A6a

啱啱過去嘅週末，去咗台北一趟，順道買下模型。雖然收獲唔算好豐富，只係買咗兩盒，但已經好滿足，因為係自己鐘意嘅絕版品。

第一盒係1/20 racing pit term，初回版係1979年，outer box超新淨，只係水貼微黃，應係近年嘅復刻版本。最驚喜係唔單只有人型+工具，仲有埋防撞攔，只賣385台幣，折合約港幣$91。一年多前曾試圖喺ebay bid，但比人bid走咗，成交價仲要成二三百元，所以呢盒真係好抵。

..............

第二盒係F189嘅前期型，依家喺香港搵到嘅都係後期型，early version已經唔多見，印像中康田好似仲有一盒，但係我略嫌佢個盒太殘，所以無買，好似賣緊$110，有興趣嘅朋友要快手la。我呢盒折合一樣係$91，所以即買。

呢兩盒我都係喺萬品館買嘅，去嘅方法係搭捷運到劍潭站再轉的士，車費約HK$30，車程只需十多分鐘。佢嘅格局有D似康田，但比康田大一倍以上，共有兩層，工具飛機船艦超多，相對車模唔算十分多，但都有D絕版品，好似雙星盒312T3仲有貨。佢show出嘅差不多每款只得一盒，所以唔知比我買走嗰兩盒仲有無keep store，網友要留意。

另一個尋寶之處係西門站附近嘅萬年商業大廈(見圖)，有D似信和，四樓主要係我尋寶嘅地方，本來抱有期望，出奇地我竟然空手而回。當中有三四間模型舖，講真大部份香港都會買到，價錢同新淨程度都係萬品館佔優，有心尋寶嘅，我始終都係推薦萬品館。另外有一兩間日本書店，都有D舊雜誌，值得逛逛。又有幾間類似名車博覽嘅賣成品車，價錢唔算抵，不過睇下無妨。

因為我住喺台北車站附近，所以順道去埋統一元氣館既高達展館。除咗有售一般高達模型及商品，仲display咗大量完成品，不過水準參差，值得一提係部份高達模型標明話係台灣特別版，不過價錢比起普通版高出一截，有much分別留待高達粉絲去深究la。講到尾個展館模式咪好似愉景新城個高達展館囉，如非超級fans，不去也罷。

至於另一個有網友提議去嘅改件模型店，因位處三重市，唔就腳，所以無去。

日本Mr. Craft倒閉，少咗個去日本淘寶嘅理由，正好趁依家台幣𣾀率低，去台灣走一轉，買吓模型，食吓地道美食，一樂也。最後要多謝幾位網友之前嘅建議同資料，使我唔使多走寃枉路，thx

唔係我唔想買呀，買唔落手咋

話哂都成30年前嘅製品，我絕對無投訴，唯有自己執吓佢la