小弟對砌模型方法的一些見解
最近在FB看到一些討論, 有感而發, 想同大家吹下水有關幾個模型製作的步驟. 所有意見都係建基於小弟個人經驗, 未必係最好的方法. 歡迎大家友善討論.
先要明白, 小弟係一個絕懶的人, 可以做小一個步驟就小一個步驟, 我吾係代工, 做模型只為自娛, 吾係為比賽, 更吾係完美追求者. 對我來講, 最皇要自己開心, 自己滿意成品.
1. 底灰
小弟絕小噴底灰. 我無吾認同底灰的作用. 底灰可以統一發色, 可以遮一些小的花痕. 例如你用400沙紙磨完直接上色係會見花痕的, 上灰可遮小小. 灰仲可以令模型油咬實落模型度. 上灰好處多多, 我知我都明. 不過我吾覺得係必須. 我吾噴灰主要有2個原因, 第一係臭, 灰個陣味大過油好多. 第二係懶, 我係屋企無固定架步, 成日要去時租場噴, 所以儘可能一次做晒要用噴筆的工作. 而家一盒RG閒閒地百幾粒件. 如果全部上灰, 等於噴多一次. 時間用多一倍. 因為我懶, 我吾想噴多一次. 所以我絕小上灰. 但吾上灰同時又有發色問題. 我想出來的色係點, 用乜色噴, 真係靠經驗先知. 例如高達個胸我鐘意淺藍色, 因為本身好多時係深色件, 你噴淺紫藍色會令出來的色受影響, 到時出來就係淺藍色, 之後陰影噴完又影響出來效果. 所以所有事都係不停試之後的結果. 另外, 吾上灰, 打磨時最好用到3000沙紙減小花痕, 如果吾係會好覺. 灰真係會幫油咬實落件, 吾噴真係會令整花機會增加, 小弟通常只砌B社的模型, 我覺得整花程度係接受範圍內.
2. 底色
底色的影響遠比底灰大, 吾知大家有無留意, 其實模型油的樽蓋個色係好準的. 不過一定要純白色為底色. 你噴灰其實出吾到樽蓋個色, 會瘀色左. 無咁鮮. 白灰又無咁好用. 如果你盒模型吾係完全分色如RG, MG等, 黃色, 紅色, 藍色係一定要上白色做底(白灰都得). 如果吾係出來的色一定吾同. 但同樣, 砌左好多之後, 你會發現支油係乜底色有乜效果, 好多時大家吾係真係要個蓋隻色. 最緊要係出來的色係你想要的效果.
3. 開油比例
小弟由1:0.5去到1:3都試過. 大約最好的比例係1:1.5~2. 如果小過1:1, 好易噴點, 出來會鞋. 如果超過2, 好易變濕噴, 出來好滑, 不過易有眼淚. 坦白講, 我吾係隻隻色都用吉樽開. 好多時係直接倒入噴筆再加開油水. 攪完谷一谷槍, 頭幾下吾好要. 噴幾件試下就知好吾好噴.
4. 金屬色
由我第一次上網睇金屬色, 已經不停見人亮黑底再上色等. 其實吾同金屬油對底色的要求係完全吾同. 我用Mr. Colour油, 金色, 銀色對底色要求好低, 可能因為有金屬銀粉類蓋過底色, 黑又好, 白又好, 噴完效果差不多, . 但係用其他牌子油, 黑底白底出來係2隻色. 黑色係明顯瘀色. 不過又有人大讚黑底的金係如何真實, 白底好膠等. 其實我個人意見, 你自己鐘意就好. 我無大家咁勤力, 一件野先底灰, 黑底, 再噴金, 之後再透明黃. 我都係溝完油直上, 不過打磨大家真係要記得磨滑先噴, 如果吾係會見花痕. 金屬色最忌係吾夠滑, 所以打磨個底夠滑好重要. 另外, Finisher的油極好噴. 相反個類開好晒油個d我就真係吾鐘意用, 通常開到好稀, 要小風薄噴, 乾左再噴, 真係用超多時間
5. 保護油
我用開大陸有幾個牌子的水貼, 幾好用. 不過好多pattern佢地無. 另外有些牌子的水貼個邊比較明顯. 如果係光面的模型, 貼完水貼係要噴光油去遮一遮條邊. 至於吾係光面的, 我好小噴保護油. 一個原因, 懶. 我有好多盒模型完成左10年以上, 無噴保護油, 水貼真係會跌落來, 所以我知保護油真係有用, 不過又要開壇為噴保護油, 我真係懶, 無做.
小弟寫左好多, 只係想表達一件事. 好多步驟係好多前輩日積月累的經驗而定下來. 點解要咁做, 當然有一定原因. 但我始終堅持凡事自己多思考, 諗一諗點解要咁做. 自己又試下. 搵一個適合自己的方法. 同時都要對其他人用的方法保留一個尊重的態度. 盒模型係屬於你, 自己滿意, 開心就夠.
|
分享
