HG Revive - RGM-79 - GM
八月真係多災多難. 小朋友病了, 之後又到我. 差不多好番的時候病情又突然加重. 過左幾日, 我好番小小, 不過又到太太都病埋, 仲要入院. 之後小朋友的病又反反覆覆. 我未完全好番的時候又要照顧入院的太太, 又要睇住小朋友, 真係心力交瘁. 工作了20多年, 第一次係8月便將全年的年假及病假用盡. 經濟吾好, 公司生意都好一般, 有好多東西要調整, 各樣事情都逼到我透不過氣. 心情極度惡劣, 跟本都無心機砌模型. 不經不覺差不多無掂過模型2個星期. 终於, 老婆出院, 我身體都接近回復正常, 所有事情好似告一段落, 我先有小小心機拎起盒模型.
其實我一直吾明, RX-78有咁多Version, EG, HG, HG Revive, RG, GTO, 為乜吾肯出一盒新版的GM? HG GM真係好醜. 係病之前, 見到日本有一位網友砌左盒0079吉姆, 係用吾同的GTO版夾埋一齊去完成, 感覺非常吸引. 不過上網望下, 其中一盒係PB炒貨, 另一盒德安島, 加埋成本$500. 砌盒HG 要500.....有點接手吾到. 於是出街買左盒HG GM, HG Revive RX-78, 想自己改. 不過其實係完全吾work. HG GM 係肥同矮型, HG Revive係9頭身, 跟本完全吾夾. 之後有網友又放左盒EG同3D print改件. 不過套改件....有點吾太似GM. 我於是又研究EG +HG GM得吾得....結果當然係完全吾得. 最後都係放棄, 等幾時有PB再販. 就係我上淘寶隨便睇時, 竟然見到有一set 3D print改件係俾HG Revive用......外型好過EG個set, 於是馬上訂貨. 同個賣家傾過, 佢係用4K 3D print. 有部份的件好小紋, 小腳件則好多. 我目測頭, 裙, 背包, 槍應該係抄HG. 我沒有進行假組, 直至噴完之後先砌埋一齊. 比例上覺得小腳有一點點過長, 腰裙有點向前太出, 太橫及太短. 我將前後裙掉轉裝, 睇落順眼點. 心口中間個位好似太細, 睇到腰個位. 頸部好長, 不過咁先可做到低頭的動作.
由於要改色, 無可避免要上灰. 感覺3D print件好吾上色, 我慢慢噴要噴2次灰先完全cover. 噴完灰之後, 3D print紋完全現型. 只係我無心機再去執. 一路噴灰的時候, 真係覺得好浪費時間, 完全吾適合我. 其實我只會係要改色同玩扭旦膠的時候先會上灰. 其他情況真係點都吾會噴.
綠色 Mr. Colour 20 (陰影用深綠色)
紅色 UC20
灰色 UG09
黑色 Mr. Colour 14
銀色 Mr. Colour 208
鐡色 Modo MX-02
坦白講, 我覺得一點都不會比GTO版差. 只係處理3D print件比較煩. 如果搵到個source, 真係買file自己搵人係香港用8K print好過. 而定一盒HG Revive先$58, 訂埋改件都平過一盒德安島GM, 仲要佢個胸吾係用GTO個種突胸, 真係完全無投訢. 喜歡GM又吾鐘意肥肥矮矮的HG真係無理由吾砌. 吾知點解我訂個時寄多左一set腳的件給我, 我反正之前入左HG GM, 所以又砌一盒. 今次打磨比較用心, 3D print的紋都磨晒. 認真講, HG個頭本身的透明件真係完勝3D print件, 不過對耳仔就3D print比較好睇.
老婆問我, 點解砌2隻一樣, 我話有小小吾同架.....佢只係話真係睇吾出......
Full Size Photo link :
https://photos.app.goo.gl/o6gaz5bQC6Yv7XrA7
#3DPRINT, #GM, #HG, #HGGUNDAM