吾知大家有無試過因為一支油而搵盒適合佢的模型來砌呢? 今次沙剎比就絕對係因為GAIA-038而砌的模型. 喜歡038個種紅又吾刺眼的顏色, 第一次見呢支油係2年前係時租店我隔離位師兄係度噴, 個一刻已好吸引我眼球. 當時GAIA一油難求, 等到佢番貨之後, 我入左支來玩, 不過我一向小砌光面模型, 所以都未有特別用途, 只係有時噴幾粒件作為點綴. 直至最近幾盒, Freddom GCP, God, 百式都有用, 突然有一刻想噴盒成身紅色的模型, 腦海裡即時浮起沙剎比, 搵朋友入手呢盒RG, 完成手頭上的模型之後馬上動功.
無論MG定RG, 沙剎比都係有極高評價, 但我一直無對佢特別有愛. 雖然也未至於討厭, 不過真的沒想過自己會砌. 一直以來只係砌過一次SD, 也因為成品不理想, 連拍照也沒有. 感覺上沙剎比大大隻, 成隻都係紅色, 有點寡, 對我來說不是很吸引. MG Ka 版推出之後, 多了好多細節, 豐富了整個做型, 大大提昇整體的感覺, 不知是誰開始為沙剎比用上金屬紅上色, 更加係進一步提昇了沙剎比的吸引力. 一位我非常喜歡的台灣模型師有介紹過並製造鏡面效果的紅色, 真係做到超合金的感覺, 整個成品極之漂亮. 這樣的製作難度及需要的技術相當高, 我沒信心能做到, 也沒有打算做. 我能做的只是簡簡單單去完成一個金屬色噴塗.
自己一向不擅長光面的製作, 今次大膽挑戰一下以金屬色去製作. 係剪件時, 完全留意吾到原來紅色係分左2隻色, 只有係完全白光燈下先分到. 而我覺得2隻紅太似同埋2隻色吾夠, 心入面定了要以3種紅去表現. 主色一早定了是GAIA038, 但其他紅色就比較傷腦筋. 上網搵左好多介紹, 大部份都係金銀底加透明紅. 為左睇多次效果, 我試噴過幾款金屬紅色係吾同底色的效果. 不過都係吾太滿意, 金底再噴紅油係最接近心中的紅, 剛巧之前有師兄退坑收左2支Gaia SP02 魔幻紅, 於是就以金底加魔幻紅去製作. 魔幻紅(金底)的效果有一點點紅橙色的效果, 作為"淺紅色" 都很適合. 如果吾想有金屬感, 用番普通底色就得. 係噴完魔幻紅之後, 吾知點解有部份件好似做左小小消光咁, 有部份又光面. 明明同一支油, 同一個環境一次過噴, 完全吾明白點解有分別. 為了搵出原因, 我做了多次實驗, 最後發現你想提高光澤, 用濕噴的方法, 大風中油距離遠一點. 想出來啞面小小, 細風細油距離近點, 感覺好似噴完即刻吹乾左咁. 為了統一出來的光澤, 最後每件噴多次半光. 深紅方面, 會以另一支偏棗紅色的金屬色紅作底, 再噴2層透明紅, 為左表現出吾同色塊的質感, 最後加一層消光. 雖然都係透明紅, Gaia, Mr. Colour同Finisher都有完全吾同效果. 當中Finisher係比較深同易發色, 用作深紅就剛好.
而其他骨架方面原件係分黑及灰色. 不過我又吾係好鐘意佢個分法, 我認為係甲入面透出來的位置用黑好過灰, 灰夾紅總感覺怪怪地. 於是又要自己再分下色同埋要手油補色. 不過對比起其他RG, 沙剎比係分件上都吾算仔細, 我想跟我心中的分色去噴時都係要做頗多的遮蓋. 不過最"震驚"我的是竟然要做無縫.....好耐無見過係RG有咁明顯的夾口.......我知呢d係基本功, 鬼叫我基本功吾好咩.....偶爾在網上見到有3D Print的燃料槽, 從未試過GK及3D print的我又膽粗粗試玩下. 無我想像中咁難, 不過初次試玩, 噴得吾係太好, 明明係光油, 噴完好似消光效果, 要玩多幾次試下要點做. 改件係比例上算是比較短, 小了一點霸氣. 不過就比原件精細好多, 原本個條真係吾掂....
今次另一個大挫折就係噴射口的黃色. 由於本身已經好紅, 所以噴射口我就轉用黃色. 如果純做遮蓋去搞噴射口實在太難, 之前我會噴銀色, 再手油透明紅琺瑯油係入面. 不過今次想用黃色, 同埋上次試過手油黃色完全吾上色, 所以今次用噴. 噴完銀色之後遮蓋了大部份再用噴筆噴琺瑯油, 之後再抹走出界位. 結果一樣係吾上色, 噴得好差, 最後補多小小透明紅係邊. 實在係製作得太醜了, 未搵到點上黃色前我吾會在搞黃色噴射口.
深紅 : Mr. Colour GX215 (Metalic Blood Red) 底, Finisher FI-055 透明紅, Gaia消光
紅 : GAIA038 Metalic Red
橙紅 : GAIA EX-08 (金色)底, GAIA SP02 Premium Red 2層, Gaia030半光
灰 : 雙星 LP-61 Metalic Grey
黑 : Mr. Colour C78 Metalic Black
銀 : Mr. Colour SM206
金 : 40% 122 + 60% Gaia EX-08
黑鐵色 : Modo MX-02
為左增加細緻度, 都幾多地方手油補色, 主要都係琺瑯油加放大鏡, 不過自己手功真係吾得.....一撻撻咁.....吾太覺眼就算.
坦白講, 砌呢盒都好花心機, 單係搵紅色都煩死, 又要睇得出分別, 又吾可以好大分別, 好多位又要自己做遮蓋. 但又莫名其妙地好似中毒咁, 成日想噴起來睇下效果. 剛巧入了支2手Infinity噴筆, 用0.4來噴大面積真係好爽, 砌完呢盒, MG KA應該要收埋先. 吾想再見到沙剎比住. 雖然放了很多心機落去, 但同好多大師的鏡面沙剎比相比, 仲有好大距離. 我吾係覺得自己的沙剎比吾靚, 但真係未去到好吸引人眼球的作品。 我用吾同光啞度想做出吾同質感又好似吾係好覺眼, 其中2隻紅色仔細睇係有分別, 不過吾算太覺眼, 做左好多好似白做咁, 感覺上有點打擊. 同埋吾係好識影紅色作品, 總感覺實物的金屬感更強.
PS : 係製作呢盒沙剎比時, 決定放棄一星期一隻成品的目標, 因為真係砌吾切. 如果一星期一盒HG都仲得. 一星期一盒RG/MG真係有點吃力.... 最近莫名其妙地鬱鬱不歡, 心情吾好想洗下錢, 結果入左20多盒模型. 明明已經將山積減到50盒, 又一下昇到差不多80盒. 本身個工作室已經放了很多雜物, 而家再增加山積, 真係無位放了。 Display櫃都有同一個問題, 開始無位放display了.
Full Size Photo link :
https://photos.app.goo.gl/kh9CmiK9nrEhoP6z8
#SAZABI,#MSN04, #RGGundam, #Gunpla,#RG