DB - ZGMF-X20A - Strike Freedom
今年年初的時候, 我定下了想一星期完成一盒MG/HG, 來到呢盒, 終於做吾到. 砌這盒模型時真係吾知點解總係懶洋洋, 提吾起勁. 開始打磨一陣又休息 總係做小小就停. 拖拖拉拉3星期先完成.
對於這盒模型, 我內心真的十分糾結. 自己一向也不會玩GK, 也不玩國模. 最大原因當然係版權的問題. 年小的時候, 我不下一次跟朋友爭拗得面紅耳熱, 過了半世人, 反而越來越不在意. 雖然我仍然是極力避免, 但這一次只能說, "怪你過份美麗", 我投降了. 玩沒版權的出品就一定是錯, 如果大家有任何不滿, 也請高抬貴手, 跳過這次分享. 不必在此討論對錯的問題.
這一次, 國模是一個超越原版的水平去開發, 我自問沒能力去將MG變成MB的級數, 把心一橫就入手一試了. 開盒之後, 真是十分驚訝. 以分件的仔細度來說, 只能說是超越MG, 是一個1/100的RG. 印象中只有RG Hi-Nu曾經給我這份件數上的震撼. 以往我會先將全部件剪出來打磨, 依顏色去上色. 今次這個製作順序是行不通了. 今次是依據身體部位去上色. 先砌頭, 身, 腰, 再來手腳, 最後背包. 由於部份顏色係身體部份只有小數件, 真係洗筆洗到傻. 另外, 為了方便剪件, 我用Excel輸入了每個身體部位的件號, 這樣做個filter就可以跟據每一板去剪件, 而在剪件時按身體位置分好. 畢竟是第一次砌國模, 不知夾口等質素, 製作時也是懷著赴刑場的心情. 組裝了頭及身之後, 只能說沒想像中的差, 但仍然是不及B記. 因為有點複雜及不太可能拆除, 組裝時真係要細閱說明書, 避免出錯. 基本上只能說, 砌完再拆是一定不可以. 真的要萬二分小心.
由於件數真的是超誇張的多, (聽說是700件, 我沒數過), 光從框中剪件及分類已花了我5小時, 之後還有漫長的打磨及上色. 打磨時感覺原件的膠質是比B仔差, 顏色也不好, 反而電鍍的顏色不俗. 由於不想洗電鍍, 組裝時發現很明顯的水口就用筆點一點. 只能說, 想玩這盒模型的人最好有心理準備, 件數來說是直逼PG級的. 本來想洗電鍍, 可幸是沒有洗. 要我每件去噴真的是吃不消. 雖然想說電鍍件不用打磨, 其實不打磨是不行的. 有很多位電鍍件小小凸出的水口足以令你砌吾到, 好好看清楚什麼地方要打磨吧. 另外, 好多地方都只是靠一個好幼的接觸點去固定, 我個人認為不是十分好..
製作這盒模型時, 好多地方的上色都處理得不好, 例如應該有3隻色的灰階. 本身3隻色是好明顯不同的, 噴完陰影就有點難分辨. 黑色件的高光位也處理不好, 紅藍用了灰色為陰影也令成隻灰沉沉. 總之就係問題多多. 再加上進度超級緩慢, 真係好磨滅鬥志同激情. 當我完成了所有上色, 準備將砌好的翼拆下來上水貼, "啪"一聲, 翼的關節斷了.....細看之下, 原來個位吾係用軟膠, 電鍍位插電鍍位, 超實, 經不起你扭佢.
白色 Mr. Colour C107
深灰色 Mr. Colour C306
淺灰色 Mr. Colour C338 + 小量黑及灰綠色 Mr. Colour C31 (用剩溝埋)
黑色 Mr. Colour C14
紅色 UG20
藍色 UG14
鐡色 Modo MX-02
銀色 Mr. Colour SM206
腰支炮 Gaia 027
小弟真心覺得自己砌得吾太好, 不過我絕對吾會再砌一次, 真係好累. 上色吾夠好, 唯有貼多些水貼遮醜, 水貼都分幾次貼先完成. 這一兩年都係0079為主, 今次玩番呢類"中二"機, 覺得SF真係好型, 不過就吾係好有勇氣幫佢擺幾個"中二"pose, 費事整爛.
我個人意見的總結為, 太多不必要的分件, 增加打磨及組裝的時間. 關節位過鬆或過緊. 要留意吾係用軟膠部份的關節, 因為關節係電鍍, 電鍍插電鍍好易一扭就爛, 建議先磨走電鍍才安裝. 部份水口位的位置不太好處理同埋部份金色電鍍位水口係當眼處. 基本上背翼太重, 裝翼之後無可能企直, 一定要用佢個地台, 不過我又懶, 無噴埋個地台. 雖然分件可用碎裂去形容, 可是槍的藍色位又不分件, 真係吾知佢想點. 因為吾想做遮蓋, 支槍直接無視, 無完成到. 另外 可動位的支點不可靠, 設計上有一點牽強. 一砌錯就很難拆掉再裝, 好多軟膠位吾夠實, 例如腰支炮就會垂下, 背翼也吾夠緊. 不過要讚的是夾口大致上沒有什麼問題, 也很小高低級現象, (不是沒有, 是比較小). 要留意係上手臂, 我基本上剪晒入面的接駁位才安裝到, 腰炮是有最明顯的高低級. 基本上有30%的地方係要用鉗才可安裝(所以弄花了很多地方). 至於比例就真係無得彈, MB的比例完勝了MG. 經歷了重重困難, 好好完成了的話在外型上是一個超越MG的存在. 可能係自己偏見, 說句老實話, 跟RG Hi-Nu一樣是多件到暈, 也是小小地方也來一個分色, 不過砌Hi-Nu是不停有驚喜, 砌呢盒會有種"搞乜啊, 個設計咁既?"的感覺. 總括而言, 這盒模型的質素遠比我想像中好, 吾係無缺點, 不過係可接受範圍, 不過要我拎佢來扭, 擺post就免了, 總感覺吾係好實淨.
之前訂下的目標一星期要完成一盒HG/MG, 如果來緊都係呢個Mood, 都幾難達成. 砌到一半時, 我真係想直接買盒MB算....
隨著MGEX的推出, 其實沒大必要入手呢盒, 從已公佈的照片去看, MGEX比較健碩, 外型上也非常不錯. 喜歡SF的朋友可以等一等入手MGEX.
感謝各位細看到這. 再一次重申, 小弟絕無推廣沒版權作品的意向, 真係怪你過份美麗, 忍吾住入手了這一盒. 大家就當我玩手辦改件吧. 而小弟未來也沒打算再組國內出品, 真係煩瑣到有點怕怕.
Full Size Photo link :
https://photos.app.goo.gl/cxPpPad3fJVYU6Yi7
#StrikeFreedom, #GUNDAM
分享
