上星期五， 早上9點幾，一部A199救護車奉召到香港仔漁光村將一名跌傷女士送院。當救護車沿薄扶林道駛至瑪麗醫院對開巴士站時，被一部22S綠VAN強行閘停，救護車上梁姓司機馬上通知上鋒及報警。
據VAN仔乘客報稱司機十分「惡霸」短短幾分鐘內4度與救護車「短兵相接」，消息指綠VAN響薄扶林花園小路駛出薄扶林道西行線時，睇都唔睇就衝出大路，當時響大路行緊的A199救護車即時煞車避過一劫。之後綠VAN不斷在快、慢線穿插，至嘉林閣對開見有人截車，二話不說即快線揪入慢線停車上客。尾隨救護車差啲中招，於是響號提示。其後綠VAN司機不滿被救護車頂住兼畀人呠，趁機爬過救護車並駛至瑪麗醫院對開時突然急煞車，夾硬截停後面部救護車，61歲姓戴小巴司機隨即落車捉住救護車司機嚟鬧，唔畀送病人去醫院！幾分鐘後，警員與另一輛救護車趕至，但小巴司機依然唔肯「放人」，最後在警方協助下，病人才原車送抵急症室，治理後並無大礙。
呢個司機真係惡得交關，足足拖延了十分鐘，如果當日車上病人等住救命，真係隨時導致病人得不到及時救治至死，請問綠VAN司機大叔，你孭唔孭得起誤殺罪呢？亞水都知，凡駕駛者遇上響起警號的消防車同救護車，就應該在安全情況下馬上讓路。而呢個大叔唔讓路不特止，仲要莽顧車上乘客同其他路上使用者安全，切線閘車，簡直目無法紀！
警方調查後相信事件因切線爭路引起，暫列作「交通投訴」處理，無人被捕，會由港島區交通部調查組跟進，綠VAN司機亦獲即場放行。其實咁多人證，己經足夠鋤個大叔危險駕駛扣佢10分。
分享
