前言: 其實自己比較偏愛BB戰士, 因為容易完成又方便存放. 但老媽一句”乜你次次啲模型都矮矮肥肥o架!”, 就令我有著手”另類”模型嘅衝動.
模型簡介: 黑騎士係五星物語第一部出場嘅MH(可惜出場無耐就俾最強幻像用”陰”招打低咗), 論知名度, 可以與黃金, 最強, 裘諾安(又有譯名為尊侖)相題並論(當然沒高達出名.). 黑騎士無國家背景, 亦無係王國手下仕官(除咗第五代), 最多都係間中參與別國武指導工作賺下外快咁. 黑騎士前後有五代, 每代嘅裝甲因為駕使者唔同, 亦有所分別. 今次製作嘅係第五代嘅黑騎士(雖然係叫第五代, 其實反而係最初嘅設定, 因為五星物語係倒敍故事, 睇過嘅朋友應該會明白.).
模型其實買咗好耐, 所以亦封塵咗好耐. 睇番出產日期, 原來巳經係九年前嘅產品. Wave亦係剛係塑膠模型上起步, 可算係實驗品(質素亦反映係埋上面……).當年用咗$145購入(價錢張貼紙仲係個盒度), 家下都仲有得賣( 雖然唔算普及), 價錢亦無乜大分別. 未開始砌之前, 滿懷希望, 開盒之後就係惡夢嘅開始……
循例睇下說明書, 無乜特別, 亦好似無乜特別要注意嘅地方, 好! 開工大吉. 一砌之下, 咦? 乜啲夾口咁大嘅? 叫做裂口就差不多(俾bandai寵壞晒!). 雖然九年前嘅產品唔可以同今時今日嘅比較, 但係以九年前嘅水準黎講, 都係非常差, 可能同當時wave無出產塑膠模型有關. 分件亦唔算好, 所以上色噴色亦份外麻煩.
由十月下旬開始砌, 不過中間有啲阻濟, 同埋砌到無心機(曽經掉底咗佢走咗砌BB老虎同HG強人) 要到年尾先完成到. 雖然模型係全可動, 不過啲關節就非常之差, 唔係緊到郁親就會整裂夾口, 就係鬆到經脈盡斷咁. 如果你不幸都擁有依盒模型而未開工又想開工, 我就建議你fix死個post好過.
後話: 雖然百幾蚊盒模型今時今日唔算貴, 不過依盒就真係會砌到你好無心機, 而且出黎嘅成品亦唔可以同首辦相提並論, 所以如果真係想擁有一個黑騎士, 我建議你都係買盒首辦好嘞……(同係列我仲有三盒, 點算呢……
)
[
本帖最後由 stlau123 於 2006-12-30 07:31 PM 編輯 ]