RG04 - Zaku II - MS-06F
我好小會係一開始寫結論, 不過呢盒有點忍無可忍. 如非必要, 千萬吾好砌呢盒RG!!!!!
渣古呢盒RG係好早期的作品, 所有RG的缺點都係度. 太碎, 太多色塊, 1/144做活動手指, 一體成型的骨架, 過淺又過多的刻線. 外型上有點奇怪. 色塊位置奇特. 最過份係關節不穩同脆弱. 小弟係組裝過程中竟然整斷條手骨最小3個位, 而家右膊頭要痴死, 右手肘只係吊住係度, 入面連動又斷左. 仲有好多奇怪的關節位, 例如, 以渣古的腳版, 為乜要加腳趾位? 仲有個幾條氣管, 我已經萬二分小心, 不過頭個粒有一粒穿膠花時跌落地, 跟住就搵吾番啦......腳條管係組裝過程又自動彈開, 仙女散花, 又一地都係.
我吾係吾鐘意將渣古圓圓地變成多線, 碎甲, 即係好似鐵甲萬能俠一樣有碎甲版. 但係而家整盒野吾靚又脆弱. 真係好失望.
同小弟剛完成的一盒RG Force Impulse比真係好大分別. 上一盒RG Force Impulse 無論係可動, 比例, 分件各方面都好滿意, 雖然討論小弟的成品人數不多, 不過吾緊要, 過程中我係好滿足同開心的. 由於係製作Force Impulse期間, 突然好想砌隻綠揸, 於是搵下1/144有乜選擇, 最後就選定了RG綠揸, 主要原因係睇相外形都OK. 不暪大家, 由剪袋個刻我已經後悔. 望住個排喉管, 要逐粒逐粒整.....又要磨又要噴........
吾計喉管個幾十粒件, 即使佢分件分得咁散, 整落吾算多件. 都係分4日, 每日磨1個鐘左右便完成打磨. 用色方面,
淺綠色 : UG06淺綠色. 陰影 : Mr. Colour 16深綠色
淺綠色塊 : 我係用淺綠色加深綠色溝出來, 比例50:50, 陰影 : Mr. Colour 16深綠色
深綠色 : Mr. Colour 16深綠色, 高光 : UG06淺綠色. （由於深綠色只有身驅部份， 我無再分色塊)
骨架 : Gundam UG09(淺灰)
黑色 : Mr. Colour 14(Navy Blue)
我認為揸古本身不適合大量的水貼， 幾個自護標誌， 盾牌的軍階便足夠。 不過最大問題係揸古真係好適合舊化及戰損, 而我係呢兩方面係完全吾識(其實係懶, 吾想學, 吾想試. 人老左真係吾想試新野), 所以只可以砌隻乾乾淨淨的渣古.
暫時來說, 係小弟最不推介的一盒RG. 草草完成, 連相都吾係好想影.
Full Size Photo link :
https://photos.app.goo.gl/bNCEXs3sVuZN9U7M6
#ZAKU,#MS06F, #RGGundam, #Gunpla,#RG
分享
